Category: 小一面試

考小要識20內的加減，都系我地自己教佢。平時我地會鬥快計數，亦都有用一個“閃算”app 計數，你可以在app調教每個數位出現的時間，譬如2秒，同埋出幾多個數字，譬如5個。小朋友要記住d 數字，每次加上去，最後要輸入答案。呢個app唔單只訓練加數，同時訓練埋反應同記憶力，仲系kill time 神器，等車用一流。有次玩住閃算等入Lion King 場地，仲吸引埋隔離個小朋友一齊玩添~ 另外我地都會教佢少少乘數同除數概念，乘數易教d，連續加就可以。除數就用實物教，譬如有15粒糖，有3個小朋友，每人可以食幾粒呀。

考Flyers已經唔再係為任何面試，單純想keep 住學習心態、keep住練習英文，學下新野。 Flyers考的形式同Movers、Starters一樣 ，包括聆聽、閱讀書寫、口試三個部分，考試亦是1.5小時。Flyers同Movers最大分別是Flyers除左要考tense，仲要考寫作，而口試部分都有分別，以往係回答考官問題，今次要跟住題目，問返考官問題。 Flyers Reading and Writing共有7 parts，需要40分鐘內完成（考完我先知係40分鐘，我一直以為同Movers Starters 一樣只有30分鐘 =.=”），最難的寫作部分放在最後，由於Flyers 的文章比Movers 難同長，答案有時無得直接copy and paste，小朋友真係要理解文章內容先可以回答。正因為咁，去到最尾的看圖寫作部分時間已經所剩無幾。 寫作要求最少20字，題目會俾三幅圖你，看圖作文，free flow 的，寫咩都可以，合理就得。作文我女平時好少練習，通常只係寫下句子，但平時陪讀我地會作下故事，天馬行空咁咩都講下。Tense 方面我就無同佢溫習，主要靠平時閱讀浸返黎。 今次都係15盾，又係食好西做獎勵~

考完Starters後就忙住參加小一面試，學術野放埋左一面，集中處理面試先，有機會再同大家分享各間學校的小一面試問題。 Movers考的形式同Starters一樣 ，包括聆聽、閱讀書寫、口試三個部分，考試亦是1.5小時。Movers同Starters最大分別是Movers要考tense。Reading and Writing 其中一部分係comprehension，當中會包含各種tense 如present tense, past tense及present continuous tense，而最後一條會問故事主題，所以小朋友要真係理解故事講咩先得。 Tense 對幼稚園小朋友黎講係難（我明明記得以前小學先會學tense,宜家幼稚園就要識。。）平時多d閱讀的確有幫助，等佢地習慣睇字，有唔識得字都好，繼續睇，慢慢佢地就會大概估到個字咩意思。考Movers 的時候已經收到心儀小學offer, 由於我地無諗住叩門，因此考Movers毫無壓力，最後我女都係攞到15盾，去食好西當獎勵！ 雖然Movers 成績我地用唔著，但都係個句，知識學左就係自己的，所以總有得著的！

英文方面亦有Cambridge English，相對Trinity，Cambridge English 難d，考的內容範圍亦都闊d，包括聆聽、閱讀書寫、口試三個部分。第一次考Cambridge English Starters最大挑戰的是考試需時1.5小時，對一個幼稚園生黎講，要坐定定，聽住指令、做卷同考官傾計難度極高。 除左考試時間長，要串字亦係一個難關。Starters word list 有400個字，Reading and Writing 其中有一part就係要串字（如下圖） 串字無捷徑，用拼音串字會快d，但都無得懶，只能慢慢同佢溫習word list 的字。Word list 的字都是日常睇書會見到的字，串左對日後都會有幫助（之後考Movers 先知有d字會出返）。 之前講過，如果要考直私就要早少少計劃，咁就可以放certificates 落portfolio，學校睇唔睇都好，起碼我地有盡力準備。可惜天氣不似預期，計好時間都好，考Starters前我地一家中左Covid, Starters要延期考，最後雖然有满盾15盾但都趕唔切放成績落portfolio。不過唔緊要，知識學左就係自己的，考Starters的過程中，你會發覺小朋友會慢慢學識串字、點睇題目、check 卷，亦開始領略到考試技巧，所以總有得著的！

英文方面有Trinity。Trinity注重英文會話和聆聽能力，考試以一對一形式進行，無筆試，對幼稚園小朋友黎講相對容易。我女考Grade 3 Merit，普通考口試唔太難，只係要同外籍考官講野，有d小朋友會緊張d。我女還好，因為平時同開姐姐傾計（佢會同姐姐d 朋友FaceTime 添，哈哈），屋企附近又有外籍小朋友，所以都見慣外籍人士。

第一年K1一舊飯咁，每日返學都係聽老師指令、唱下個、同同學食下茶點適應下群體生活，每日都好開心咁返學放學。 上到K2，就要開始慢慢准備考小一，當時剛剛有Covid，學校同興趣班都無開，有d 興趣班好好有zoom, 但講真zoom 同真人教學都差得遠，要咁細的小朋友乖乖、坐定定睇住monitor 上zoom都好高難度, 最後都係自己教把啦 =.=”  考小有幾樣野大家都有的，就係普通話GAPSK、英文Trinity同Cambridge English。今日就先講GAPSK。 GAPSK有三個Level, 分初級、中級、高級。我女K2已經考獲高級卓越一等成績，幸運地還獲得GAPSK朗誦比賽冠軍，因此可以請GAPSK教育機構出封推薦信，等portfolio 多一個亮點。 講真，考小唔係好多間學校有考普通話，係咪真係有優勢呢我都唔肯定，不過考咩都好，起碼證明小朋友有努力，同時在學習過程中小朋友多左自信心同經驗，都係一種收穫！

由於我地都係第一次當人父母，一直在網路上參考好多育兒、教育分享，而考幼稚園系第一關。我女系觀察性小朋友，要睇好耐人地的動作、環境先會行動，同時又好細膽害羞，所以我地都預左不會又名幼offer，不過我地照幫佢報左3間幼稚園等佢面試見識下。 面試老師會叫小朋友講自己咩名、邊個帶你黎面試、呢只係咩動物、呢個系咩圖案（中英文都有）、聽老師指示唱歌跳舞咁。個女在面試場地無喊、無突然跳線扭計我已經好感恩，雖然面熟表現不係太好，但都有乖乖聽老師指令，最後都有兩個offer，非常驚喜！

Disney World of English (“DWE”) 呢套幼兒英文教材相信大家都好熟識，每日我都會播d歌俾個女聽、同佢玩點讀筆、玩下slide card。我女好細個就認得ABC同123，上左PN後好鐘意畫畫，有日佢無啦啦寫ABC，初頭都無為意，寫寫下先知原來佢係由Z背返去A，當下俾佢嚇親，媽媽26個字母要倒轉背都要諗諗，而佢竟然可以好順咁寫曬出黎！雖然唔知系咪同DWE有關，但我睇真系無教過佢咁背26個英文字母，而套野我女睇左好多好多次，感覺已經回曬本啦~ 後記：DWE套野好貴，初初買時好心痛又唔敢同老公講，但貴買平用，加上我女鐘意就無計啦！數學教材就係淘寶買，簡單教加減，譬如有6粒糖，媽媽俾多2粒你後咁你有幾多粒糖呀？