Category: 工作見聞

新工間唔時要OT，又未至於O好耐，有時9/10點到啦！其中發生過兩次靈異事件。。 公司大廈係一梯一伙的，有次同同事OT收工一齊搭𨋢，去到其中一層，𨋢門開左而周圍係黑麻麻。我地等住陣都無人入黎，按關門但架𨋢又唔肯關門啦，按警鐘時security 話架𨋢壞左，叫我地出去轉第二架𨋢，咁我地唯有硬著頭皮出去啦。等𨋢期間淨係得d emergency light。。而時間過得好慢。。好不容易等到第二架𨋢黎，點知架𨋢又唔肯關門，突然我同事爆seed 踢度𨋢門，然後好爆鬧，「好啦wor 唔好玩野呀下!」跟住度門就乖乖咁關左啦！落到樓下，我同同事講好彩佢係度，咪我都唔知點算。然後同事淡淡然回應話，公司d𨋢成日都係咁，鬧下佢就得ga 啦！我好驚訝，同事好有經驗咁。。。 第二次有係OT到9/10點，諗住去埋Toilet 就走啦。去Toilet條路有d遠，仲要推三度門先去到，去之前都驚驚地，但真係好急，又唔好意思叫同事陪，所以都係焗去。沿途都正正常常，在推開最後一度門時突然有個黑影在天花板飛走，當時我呆一呆唔敢再入去。返出黎時即刻打俾老公，咁岩老公又無接電話。之後就咩都唔理，同同事收工啦！落到樓下老公打黎話頭先無接我電話係因為岩岩撞左車 (Whatttttttt..!!!) 好彩無人受傷！成件事都好巧合，而當我同同事分享時，同事話下次見到都唔好入去（大佬呀！仲下次。。） 自己歷經過的就係呢兩次，而幾年後我先知原來同事係睇到。。。有機會再分享啦！

新工作平台要幾忙有幾忙，忙到有段時間，每日早上10點工作到淩晨2-3點，第二日又係10點開始工作，最顛的時候連星期六日公眾假期都係咁=.=” 海量工作中，最印象深刻的就係上市公司分拆業務單獨上市，由一個普通project 開始，中間經歷資產、架構重組、業務、財務或行政管理保持獨立、避免利益衝突同時，亦盡可能避免擬分拆業務同上市公司剩餘業務之間不必要的關連交易，還有遞交上市申請後的上市聆訊，諗翻起都頭大。。 沒日沒夜的工作，最終迎來上市日，在聯交所敲鑼一刻真係有一將功成萬骨枯的感覺 XD（BTW，原來敲鑼可以揀大細，當然要敲大鑼就要科多d水啦XD）Listing dinner 大家輪住恭喜老細, 老細突然語重心長咁同我講：「呢兩年睇住你長大左好多！」當時我感動到想喊，原來努力、埋頭苦幹咁工作真係會有人睇到！ 每當夜闌人靜的時候，仍然感恩當日努力不懈的自己。

初初幾年做野都係上司叫你做咩就做咩，由模仿開始跟下跟下，開始理解點同人溝通，開始發覺工作上的pattern ，開始識調節自己的生活迎合工作需要。幾年後做到小小Manager, 有日諗諗下，無理由餘下40年都係咁生活丫，於是覺得係時候要轉變，走出comfort zone, 去一個新平台工作。