Month: August 2024

本來我以為全職媽媽可以好得閒、好輕鬆咁玩下bb、同其他媽媽吹下水、high下tea，點知工人姐姐屋企有事要返去，無姐姐的日子，FTM的生活俾想像中充實一萬倍。每日餵奶、洗bb用品、煮野食、洗碗、清潔一大堆家務無限loop，平時唔做家務的我洗碗洗到手都爛。大家都問點解我唔即刻請返個工人、請鐘點或叫媽媽幫下手。一係因為工人姐姐話處理好屋企野就會返黎，雖然無確實日期，但我覺得工人姐姐湊得幾好，橫掂我都無做野咪自己handle，慢慢等姐姐返黎。至於請鐘點或叫媽媽幫手係我專登唔做的，因為我想試下自己可以頂到幾耐 XD 幾個月後，工人姐姐終於都返黎，家務上終於有人幫手，而我就只係需要湊bb、同bb 上下playgroup、去下公園、教下ABC 123  ，少左左做家務呢part的確輕鬆左好多， 做過FTM 後完全明白FTM 絕對忙過返工，所以千祺千祺唔好話FTM 好得閒無野做呀！FTM係小朋友世界的全部同時要頂住無收入，睇住積蓄慢慢少的壓力實在唔容易！媽媽真係世界上最偉大的人呀！ 感謝神隊友放工後主動同小朋友玩等我可以休息下！

誠如前文提及，由於要搞個IPO，產假期間仲keep住複email，生完後即刻做野，仲好記得個女得幾個月就出trip，然後keep 住個個月都出差 >.< 有次同媽媽傾計，話覺得個女都好好湊丫，突然間就識爬識企，突然間就出左幾隻牙仔，又無咩喊又無咩扭計。冷不防媽媽講左句，話其實我太忙，忙到工人姐姐要帶個女去office 俾我抱下，根本無咩點湊，成日掛住做野，出牙仔時扭計成日喊、厭奶唔肯食野、鐘意食咩蔬菜蓉我全部唔知（下刪一萬字）。。 突然意識到時間唔等人，而小朋友的成長只有一次，因此默默做埋手頭上的野就辭職。

新工作平台要幾忙有幾忙，忙到有段時間，每日早上10點工作到淩晨2-3點，第二日又係10點開始工作，最顛的時候連星期六日公眾假期都係咁=.=” 海量工作中，最印象深刻的就係上市公司分拆業務單獨上市，由一個普通project 開始，中間經歷資產、架構重組、業務、財務或行政管理保持獨立、避免利益衝突同時，亦盡可能避免擬分拆業務同上市公司剩餘業務之間不必要的關連交易，還有遞交上市申請後的上市聆訊，諗翻起都頭大。。 沒日沒夜的工作，最終迎來上市日，在聯交所敲鑼一刻真係有一將功成萬骨枯的感覺 XD（BTW，原來敲鑼可以揀大細，當然要敲大鑼就要科多d水啦XD）Listing dinner 大家輪住恭喜老細, 老細突然語重心長咁同我講：「呢兩年睇住你長大左好多！」當時我感動到想喊，原來努力、埋頭苦幹咁工作真係會有人睇到！ 每當夜闌人靜的時候，仍然感恩當日努力不懈的自己。

初初幾年做野都係上司叫你做咩就做咩，由模仿開始跟下跟下，開始理解點同人溝通，開始發覺工作上的pattern ，開始識調節自己的生活迎合工作需要。幾年後做到小小Manager, 有日諗諗下，無理由餘下40年都係咁生活丫，於是覺得係時候要轉變，走出comfort zone, 去一個新平台工作。

每個人相遇都有d緣分。以前唔鐘意讀書，覺得讀書好無聊，讀完就考試升班，諗唔到同現實生活有咩關係，直至遇到補習老師同大學Professor 先知讀書其實可以好有趣。 符符碌碌咁畢業但唔知自己想做咩，膽粗粗按Professor建議做FI back office，反正當日年輕，nothing to loss，結果一入行就做左20年。有時諗起，好感謝當時老師推我一下，咪我仲戇戇居居下咁唔知做咩 =.=”

當年中六 ALevel揀了Econ，由於對Econ 毫無認識，就跟住其他同學柴娃娃報左補習班。唔上由自可，一上就被補習老師吸引，每個星期都好期待上堂，畢竟補習老師上堂操作、表達方式都遠比津校有趣。ALevel的兩年，在密集式上堂溫書下，可以出走一下上補習班、聽下笑話絕對係減壓良方。 畢業後，一直營營役役的工作，當年ALevel教咩一早就唔記得，唯獨補習老師上堂講的無聊野一直記到宜家！ 20年後，機緣巧合下，報讀了補習老師的課堂，繼續跟老師學野